കെസിഎല്ലിൽ മിന്നും പ്രകടനം കാഴ്ച്ചവെക്കാൻ ട്രിവാൻഡ്രത്തിന്റെ രാജാക്കന്മാർ

തിരുവനന്തപുരം: ആവേശ ക്രിക്കറ്റിന് ഈ മാസം 21 ന് തിരിതെളിയുമ്പോൾ റോയൽ പ്രകടനം കാഴ്ച്ച വെക്കുവാനുള്ള തയാറെടുപ്പിലാണ് ട്രിവാൻഡ്രം റോയൽസ്. ആറ് ബാറ്റർമാരും അഞ്ച് ഓൾ റൗണ്ടർമാരും അഞ്ച് ബൗളർമാരും അടങ്ങുന്ന ടീമിനെ ഇത്തവണ നയിക്കുന്നത് കൃഷ്ണ പ്രസാദാണ്. ക്യാപ്റ്റന്റെ നേതൃത്വത്തിലുള്ള ബാറ്റിംഗ് നിര വെടിക്കെട്ട് തീർക്കാൻ കഴിവുള്ളവരാണ്.ഗോവിന്ദ് ദേവ് പൈ ആണ് ഉപനായകൻ. ബേസിൽ തമ്പി, അബ്ദുൾ ബാസിത്ത് എന്നിവരാണ് ടീമിലെ മറ്റ് പ്രധാന താരങ്ങൾ.

അബ്ദുൾ ബാസിത്തായിരുന്നു കഴിഞ്ഞ സീസണിൽ ട്രിവാൻഡ്രം റോയൽസ് ടീമിന്റെ നായകൻ. ഗോവിന്ദ് ദേവ് പൈ, സുബിൻ എസ്, വിനിൽ ടി.എസ് എന്നിവരെയാണ് റോയൽസ് ടീമിൽ നിലനിർത്തിയത്. കഴിഞ്ഞ സീസണിൽ റോയൽസിനായി ബാറ്റിങ്ങിലും ബോളിങ്ങിലും തിളങ്ങിയ താരമാണ് അബ്ദുൾ ബാസിത്ത്. റോയൽസിന്റെ വിക്കറ്റ് വേട്ടക്കാരിലും ഒന്നാമനായ ബാസിത്ത് നിർണ്ണായക ഘട്ടത്തിൽ ബോൾ കൊണ്ടും ബാറ്റ് കൊണ്ടും കളിയുടെ ഗതി തിരിക്കാൻ കഴിവുള്ളയാളാണ്.

അബ്ദുൾ ബാസിതിനൊപ്പം ബേസിൽ തമ്പി കൂടിയെത്തുമ്പോൾ ടീം കൂടുതൽ കരുത്തുറ്റതാവുകയാണ്. കഴിഞ്ഞ സീസണിൽ അഖിൽ സ്‌കറിയയും ഷറഫുദ്ദീനും കഴിഞ്ഞാൽ ഏറ്റവും കൂടുതൽ വിക്കറ്റ് വീഴ്ത്തിയ താരം ബേസിൽ തമ്പിയായിരുന്നു. ബേസിലിന്റെ വർഷങ്ങളുടെ അനുഭവസമ്പത്തും ഐപിഎല്ലിലുൾപ്പടെ പന്തെറിഞ്ഞ പരിചയവും ടീമിന് മുതൽക്കൂട്ടാവും. മാത്രമല്ല അവസാന ഓവറുകളിൽ ബാറ്റ് കൊണ്ടും സംഭാവന നല്കാൻ ബേസിൽ തമ്പിക്കാകും.

കഴിഞ്ഞ സീസണിലും ടീമിലുണ്ടായിരുന്ന ഗോവിന്ദ് ദേവ് പൈയും എസ് സുബിനും സമീപ കാലത്ത് മികച്ച ഫോമിലാണ്. രണ്ട് അർധ സെഞ്ച്വറിയടക്കം 300 റൺസ് സ്വന്തമാക്കിയ ഗോവിന്ദ് ആയിരുന്നു കഴിഞ്ഞ സീസണിൽ ടീമിന്റെ ടോപ് സ്‌കോറർ. കൂറ്റനടികളിലൂടെ സ്‌കോർ ഉയർത്താൻ മികവുള്ള സുബിനും അടുത്തിടെ നടന്ന ടൂർണ്ണമെന്റുകളിൽ മികച്ച പ്രകടനം കാഴ്ച വച്ചിരുന്നു. കൃഷ്ണപ്രസാദ്, അഭിജിത് പ്രവീൺ, റിയ ബഷീർ, തുടങ്ങിയ യുവതാരങ്ങളുടെ വരവും ടീമിന് കരുത്തേറ്റിയിട്ടുണ്ട്.

ബൗളിങ് നിരയിൽ അബ്ദുൾ ബാസിദിനും ബേസിൽ തമ്പിക്കും പുറമെ ഫാനൂസ് ഫൈസിനെയും വി അജിത്തിനെയും എം നിഖിലിനെയും കൂടി ടീമിലെത്തിക്കാനായതും നേട്ടമായി. ആലപ്പി റിപ്പിൾസിന് വേണ്ടി കഴിഞ്ഞ സീസണിൽ ഏറ്റവും കൂടുതൽ വിക്കറ്റുകൾ വീഴ്ത്തിയ താരമാണ് ഫാനൂസ്. വി അജിത്ത് ആകട്ടെ എൻഎസ്‌കെ ട്രോഫിയിൽ ഏറ്റവും മികച്ച ബൗളറായി തെരഞ്ഞെടുക്കപ്പെട്ട താരവുമാണ്. എം നിഖിൽ കഴിഞ്ഞ സീസണിൽ കാലിക്കറ്റ് ഗ്ലോബ് സ്റ്റാർസിന് വേണ്ടി മികച്ച പ്രകടനം കാഴ്ച വച്ചിരുന്നു. മുൻ രഞ്ജി താരം എസ് മനോജാണ് ടീമിന്റെ മുഖ്യ പരിശീലകൻ.സംവിധായകൻ പ്രിയദർശൻ,ജോസ് പട്ടാര എന്നിവർ നേതൃത്വം നൽകുന്ന കൺസോർഷ്യത്തിന്റെ ഉടമസ്ഥതയിലുള്ളതാണ് ടീം.

ടീം സ്‌ക്വാഡ്: ബാറ്റർ- കൃഷ്ണ പ്രസാദ് (ക്യാപ്റ്റൻ),ഗോവിന്ദ് ദേവ് പൈ( വൈസ് ക്യാപ്റ്റൻ), റിയാ ബഷീർ, സൻജീവ് സതീശൻ. ഓൾ റൗണ്ടർ- അബ്ദുൾ ബാസിത്, അനന്തകൃഷ്ണൻ, അഭിജിത്ത് പ്രവീൺ, വിനിൽ ടീ എസ്, നിഖിൽ എസ്.ഫാസ്റ്റ് ബൗളേഴ്സ്- ബേസിൽ തമ്പി, ഫാനൂസ്, ആസിഫ് സലാം. സ്പിന്നർ- അജിത് വി, അനുരാജ് ജെ.എസ്. വിക്കറ്റ് കീപ്പർ കം ബാറ്റർ- സുബിൻ എസ്, അദ്വൈത് പ്രിൻസ്.

Content Highlights- KCL thrivandrum Royals team strong